Shugaban Amurka, Donald Trump, ya sake sanar da cewa za a saka harajin kashi 100 cikin 100 kan duk wani fim da aka yi a wajen kasar.
A wani rubutu da ya wallafa a Truth Social a ranar Litinin, Trump ya ce matakin na da nufin dakile abin da ya kira da “sata” ta masana’antar fina-finan Amurka da kasashen waje ke yi.
Sai dai bai fayyace lokacin da matakin zai fara aiki ba, ko kuma yadda za a aiwatar da shi.
Wannan shi ne karo na biyu da ya yi irin wannan sanarwa. A watan Mayu, Trump ya sanar da irin wannan haraji kan fina-finan kasashen waje, inda ya danganta hakan da raguwar cigaban Hollywood sakamakon jan hankalin masu shiryawa da daraktoci zuwa kasashen waje saboda rangwame da ake basu.
Ya bayyana wannan yanayi a matsayin barazana ga tsaron kasa, tare da jaddada cewa wannan doka za ta “tsare” masana’antar fina-finan Amurka.
Trump ya ƙara da cewa ya bai wa ma’aikatar kasuwanci izini da ta fara aikin aiwatar da shirin, duk da cewa har yanzu cikakkun bayanai ba su fito ba.
Haka kuma ba a tabbatar ko sanarwar da aka yi a ranar Litinin na nufin ƙara wa harajin da aka sanar a baya bane ko kuma maimaita sanarwar ne kawai.
