Najeriya ta ɗauki mataki wajen jagorantar makomar tattalin arzikin Yammacin Afirka yayin da ta qaddamar da Taron Tattalin Arzikin Yammacin Afirka (WAES) 2025 a Abuja daga ranar 20 zuwa 21 ga Yuni. Taken taron shi ne “Buɗe Ƙofofin Kasuwanci da Zuba Jari a Yankin,” inda aka hallara shugabannin ƙasashe, ministoci, ‘yan kasuwa, abokan cigaba, da matasa masu ƙirƙira da fasaha daga sassa daban-daban domin tsara sabuwar hanyar bunƙasa tattalin arziki a yankin.
An gudanar da taron a dandalin taruka na kasa da kasa da ke Abuja (AICC), kuma ya kasance wata muhimmiyar dama ta haɗa kai tsakanin kasashen ECOWAS domin fuskantar ƙalubale na tattalin arziki tare da cimma muradun haɗin gwiwa, bunkasa ababen more rayuwa, da bayar da dama ga matasa da ƙanana da matsakaitan masana’antu.
Kafin fara taron, Ministan Harkokin Waje na Najeriya, Yusuf Maitama Tuggar, ya bayyana WAES a matsayin wata dama mai muhimmanci ga yankin. A wata ganawa da manema labarai a Abuja, Tuggar ya jaddada cewa taron ya yi daidai da hangen nesan ECOWAS na gina yankin Yammacin Afirka marar iyaka da ke da ƙarfin tattalin arziki. “Tare da WAES 2025, Najeriya na ɗaukar ragamar jagoranci don tsara makomar tattalin arzikin yankin. Muna tabbatar da niyyar mu na haɗin kai da cigaban ɗorewa, kuma muna da tabbacin cewa wannan taro zai zama juyin juya hali ga makomar tattalin arzikin Yammacin Afirka,” in ji shi.
Tuggar ya bayyana wasu manyan abubuwan da za su gudana a taron, irin su Tattaunawar Shugabannin Ƙasashe, Taron Shugabannin Kamfanoni, WAES Deal Room, da kuma West Africa Business Expo. Ya bayyana cewa an tsara waɗannan abubuwa ne domin haɓaka tattaunawa mai amfani da samar da aiyukan da za su amfani duka bangarorin gwamnati da na kasuwa. Haka kuma, ya ce taron zai haskaka ƙwazon matasan yankin da kuma ƙanana da matsakaitan masana’antu (SMEs), waɗanda da dama daga cikinsu sun shirya karɓar zuba jari da faɗaɗa harkokinsu.
A yayin bude taron, Shugaban Najeriya Bola Ahmed Tinubu, wanda ke rike da kujerar shugabancin ECOWAS, ya yi kira da a ɗauki matakan da suka wuce jawaban siyasa, tare da tura ayyuka zuwa kasa. “Afirka ba za ta ci gaba ba idan har muna fitar da kayayyakin da ba mu sarrafa ba, muna kuma shigo da abubuwan da muke da su a gida,” in ji Tinubu. “Wannan taro ba wai don magana bane kadai – lokaci ne na aiwatarwa. Yammacin Afirka dole ta haɗu, ta zuba jari a ababen more rayuwa, kuma ta ƙarfafa matasa da mata – su ne ginshikin makomarmu.”
Shugaban ya bayyana cewa Najeriya ta shirya don shiga hannu da hannu wajen ɗaukar nauyin manyan ayyukan haɗin gwiwar yankin kamar hanyar Abidjan zuwa Lagos da kuma aikin rarraba wutar lantarki na West African Power Pool.
Shugabannin ƙasashen Ghana, Senegal da Côte d’Ivoire sun goyi bayan wannan kira na haɗin kai. Shugaban Ghana Nana Akufo-Addo ya ce: “Dole mu daina kallon kanmu a matsayin abokan hamayya, mu fara kallon juna a matsayin abokan haɗin gwiwa. Ƙarfinmu yana cikin haɗin kanmu da sauƙaƙe zirga-zirgar kaya, sabis, da mutane a cikin yankin.”
Shugaban Senegal, Bassirou Diomaye Faye, wanda ke wakiltar sabon zuri’a ta jagoranci, ya ce: “Dole ne mu gina tattalin arziki da ke bai wa mutane damar tsira. WAES ya kamata ya zama juyin juya hali wanda matasanmu za su ga sauyin siyasa zuwa dama, ƙirƙira, da samun kudin shiga.”
Shugaban Côte d’Ivoire, Alassane Ouattara, ya bayyana cewa lokaci ya yi da za a sauya AfCFTA daga alkawari zuwa aiki. “Yanzu ne lokacin aiwatar da burinmu na kasuwar Afirka ta cikin gida,” in ji shi.
Daya daga cikin muhimman abubuwan taron shi ne WAES Deal Room, inda aka karɓi manyan tsare-tsaren zuba jari daga bangarori masu zaman kansu da na gwamnati. Rahotanni sun nuna cewa an samu alƙawuran zuba jari da suka haura dala miliyan 750 a fannonin makamashi mai sabuntawa, sarrafa kayan gona, harkokin sufuri, da kuɗin dijital.
A wata sanarwa bayan taron, Minista Tuggar ya kara da cewa, “WAES 2025 ba taro ba ne kawai – wata hanya ce ta tsara cigaban kasuwanci da sabbin hanyoyin samar da kudaden shiga. Muna haɗa muryar ‘yan kasuwa da ‘yan siyasa don tabbatar da cewa an aiwatar da duk abin da aka tsara.”
A ƙarshe, an fitar da Takardar Ƙuduri ta Hadin Gwiwa, inda aka cimma matsaya kan daidaita manufofin kasuwanci a cikin yankin, rage cikas na haraji da fasfasa, da kuma kafa wata ƙungiya da za ta kula da aiwatar da manyan ayyukan ababen more rayuwa kafin ƙarshen shekarar 2025.
A cikin jawabinsa na rufe taron, Shugaba Tinubu ya jaddada muhimmancin aiwatarwa: “Ba za mu iya komawa gida mu ajiye takardu a cikin fayil ba. Dole ne abin da muka tattauna a nan ya bayyana a cikin rayuwar talaka. Makomarmu tana cikin abin da muke yi, ba abin da muke faɗi ba.”
Taron WAES 2025 ya bar sahun sabuwar fahimta da haɗin kai a Yammacin Afirka. Tare da Najeriya a kan gaba, ana kallon taron a matsayin matakin farko zuwa wani sabon zamani na haɗin kai wajen cigaban tattalin arziki mai ɗorewa, da cikar burin Afirka mai cike da damarmaki.
