Yayin da ya ke wakiltar shugaba Bola Tinubu a babban taron majalisar karo na 80 a birnin New York na Amurka, mataimakin shugaban Najeriya Kashim Shettima ya gana da babban sakataren Janar na Majalisar Dinkin Duniya, António Guterres a shalkwatar majalisar.
BBC ta rawaito cewa cikin wata sanarwa da ofishin Shettiman ta fitar ta ce shugabannin biyu sun tattauna batutuwa da dama masu muhimmai ciki har da ƙudirin Najeriya na samun kujerar dindindin a Majalisar Dinkin Duniya.
A lokacin ganawar, Shettima ya ƙarfafa buƙatar Najeriya na neman goyon bayan Majalisar Dinkin Duniyar don cimma ƙudirin nata na samun kujerar dindindin a kwamitin tsaro na majalisar.
Shugabannin sun kuma tattauna batutuwan ƙarfafa cimma muradun ƙarni, da sauyin yanayi da ƙararra dimokradiyya a Najeriya da ma yankin Afirka.
